Cargando Eventos

« Todos los Eventos

Conferencia «Un océano sen plástico»

23 de noviembre - 18:30

Máis de 5.000 quilómetros percorridos a pé, 17 meses de viaxe e decenas de encontros con científicos, activistas e asociacións ambientais. É a experiencia que Patricia Reina e Fernando Gómez, autores do blog e do libro «Vivir sin plástico», compartirán o próximo luns, 23 de novembro, na UNED de Lugo, nunha conferencia que invita a mirar máis alá dos residuos que se acumulan nas praias para comprender o verdadeiro alcance da contaminación por plásticos.

Baixo o título «Un océano sin plástico», a charla celebrarase ás 18:30 horas no Salón de Actos José Luis Prieto Arroyo e forma parte do programa «ODS en Acción 26-27» da UNED de Lugo, unha iniciativa que promove a divulgación dos Obxectivos de Desenvolvemento Sostible e a implicación da cidadanía nos retos ambientais e sociais da Axenda 2030.

Durante a súa travesía pola costa da península ibérica, Reina e Gómez recolleron residuos, documentaron o estado do litoral e conversaron con máis de 50 científicos, activistas e representantes de asociacións ambientais. Un percorrido que lles permitiu comprobar a persistencia dos plásticos no medio natural e coñecer de primeira man as consecuencias desta contaminación sobre os ecosistemas mariños.

Entre os achados máis sorprendentes figuran obxectos que levaban décadas abandonados nas praias e que permiten reconstruír a historia dos nosos hábitos de consumo. A partir destas pegadas do pasado, os relatores introducirán o concepto de «arqueoloxía de praia», unha maneira de interpretar os residuos atopados na costa para descubrir a súa orixe, a súa durabilidade e o que revelan sobre a cultura de usar e tirar.

A conferencia combinará experiencias persoais, historias recollidas ao longo do percorrido e coñecementos científicos para analizar a relación entre os hábitos de consumo e a saúde dos océanos. Unha reflexión que busca demostrar que o problema dos plásticos vai moito máis alá dos residuos visibles e que a protección do medio mariño comeza tamén nas decisións cotiás da cidadanía.

A actividade coincide coa Semana Europea da Prevención de Residuos e está especialmente vinculada ao ODS 12, centrado na produción e no consumo responsables. Está organizada pola Oficina Verde dos Centros Asociados da UNED, con sede na UNED de Lugo, no marco do seu compromiso coa educación ambiental, a sustentabilidade e a sensibilización social, e conta coa colaboración da Deputación de Lugo e do Concello de Lugo.

A participación é gratuíta e está aberta a toda a cidadanía, con posibilidade de asistencia presencial, en liña en directo ou en diferido.

As inscricións poden realizarse a través da plataforma de Extensión Universitaria da UNED:

https://extension.uned.es/inscripcion/idactividad/56657

Detalles

  • Fecha: 23 de noviembre
  • Hora:
    18:30
  • Categoría de Evento:

Recinto