Concerto en Lugo de Amandine Beyer, violinista de referencia mundial

Amandine Beyer

Dende hai xa algúns anos Amandine Beyer é recoñecida como unha referencia na interpretación do repertorio barroco para violín. A súa gravación das sonatas e partitas de J. S. Bach, foi recibida como unha revelación pola critica (Diapason d’or de l’année, Choc de Classica de l’année, Editor’s choice de Gramophone, Prix Academie Charles Cros, Excepcional de Scherzo….).

Habitual das máis importantes salas e festivais do mundo enteiro a súa actividade musical divídese entre os diferentes grupos nos que participa: Les Cornets Noirs, os dúos con Pierre Hantaï, Kristian Bezuidenhout ou Laurence Beyer e o seu propio grupo Gli Incogniti, co que gravou varios discos que obtiveron o apoio unánime da crítica internacional.

Gli Incogniti

Fundado en 2006 pola violinista Amandine Beyer, o grupo toma o seu nome da Accademia degli Incogniti un activo círculo literario liberal da Venecia do séculoXVII. 

Especialista do repertorio barroco instrumental, explorando tamén o repertorio clásico, Gli Incogniti é un invitado habitual dos máis importantes teatros do mundo: Philharmonie de París, Théâtre des Champs-Elysées, Wigmore Hall de Londres, Philharmonie de Essen, Oji Hall de Tokyo, Philharmonie de Luxemburgo, BOZAR Bruxelas… Participa tamén en grandes festivais e colabora de forma regular con grandes solistas.

Gli Incogniti grava en exclusividade para harmonia mundi: Vivaldi, Pachelbel, CPE Bach, Haydn… Os seus discos recibiron unha gran cantidade de premios da prensa especializada e do público.