Familiar «O arcón de Noa»

Idade recomendada: A partir dos 3 anos

Sinopse:

Noa é unha nena que garda no seu arcón os xoguetes que xa non a entreteñen. Todo parece vello e apagado no seu mundo solitario. Pero un día, sen decatarse, activa un encantamento e entra no mundo máxico que habita no arcón, onde os xoguetes cobran vida e un ser misterioso goberna sobre eles.

A través da linguaxe da danza contemporánea, a utilización de obxectos e a interacción co dispositivo escénico, o espectáculo mostra múltiples situacións e personaxes guiados por unha narración clásica de conto de maxia e fantasía, estimulando a imaxinación das nenas e nenos grazas a unha posta en escena alegre e luminosa.

O ARCÓN DE NOA trata transversalmente valores sociais e temáticas relevantes para o desenvolvemento emocional das nenas e nenos: a empatía, a amizade, a cooperación, a diversidade, a inclusión e o respecto ao diferente. Todos estes temas tratados de maneira lúdica, facendo uso da linguaxe corporal, a luz, a música e efectos audiovisuais para contar unha historia de amizade onde haberá emoción, maxia, aventuras, fantasía e comicidade.

ENTRADAS:

Adquisición de entradas a través do portal web entradaslugo.es e na Oficina de Turismo ata 3 horas antes do comezo de cada función; e no auditorio, o día da función, desde unha hora e media antes do comezo do espectáculo.