Conferencias ‘(Re)descubrindo o pasado de Lugo, novas achegas da investigación’
O museo universitario A Domus do Mitreo, coa axuda da Deputación de Lugo, organiza catro conferencias dentro do ciclo ‘Quedamos no mitreo’. Baixo o lema ‘(Re)descubrindo o pasado de Lugo, novas achegas da investigación’, daranse a coñecer ao público novas perspectivas da prehistoria e historia antiga da provincia.
A primeira sesión terá lugar o martes 29, ás 18.00 horas, e dedicarase á prehistoria coas intervencións do investigador do CISPAC Hugo Bal, co título ‘Das hienas de Castroverde ao mamut do Incio: a investigación arqueopaleontolóxica na provincia de Lugo’; e Tania Mosquera Castro, investigadora da USC, que falará de ‘Uros, figuras humanas e cometas. Unha achega á arte paleolítica de Cova Eirós’.
Ao día seguinte e á mesma hora, intervirán Francisco Folgueira da USC co relatorio ‘Unha cidade con vistas: a paisaxe arqueolóxica de Lucus Augusti e ou seu territorio’; e Diego Torres Iglesias, director do Museo do Castro de Viladonga, quen disertará baixo o lema ‘Quen te viu e quen vete: redescubrindo o Castro de Viladonga’.
As sesións terán lugar na Casa do Saber e son de libre acceso.
