A UNED Lugo abre a matrícula do CUID con cursos semipresenciais de inglés, alemán e portugués
A oferta para o curso 2026-2027 inclúe niveis desde A1 ata C1 e combina formación en liña con sesións titoriais presenciais no Centro Asociado
Aprender unha nova lingua, mellorar o nivel ou acreditar oficialmente as competencias lingüísticas. Con estes obxectivos, a UNED de Lugo abre desde o 8 de setembro a matrícula para os cursos de idiomas do Centro Universitario de Idiomas a Distancia (CUID) correspondentes ao curso académico 2026-2027.
A nova programación ofrece formación en inglés, alemán e portugués, cunha ampla variedade de niveis que permite adaptarse tanto ás persoas que se achegan por primeira vez a unha lingua como a aquelas que desexan perfeccionar os seus coñecementos.
En concreto, a oferta da UNED de Lugo comprende inglés desde o nivel A1 ata o C1; alemán nos niveis A1, A2 e B1; e portugués no nivel A2.
Os cursos desenvolveranse en modalidade semipresencial, unha fórmula que combina a flexibilidade da aprendizaxe autónoma e os recursos dixitais da UNED con sesións de apoio titorial no Centro Asociado de Lugo, destinadas a facilitar o seguimento do curso, resolver dúbidas e favorecer a práctica da lingua.
Esta modalidade permite compatibilizar a aprendizaxe de idiomas coa actividade laboral, académica ou persoal, mantendo ao mesmo tempo o acompañamento do profesorado titor ao longo do curso.
MATRÍCULA E + INFO
O prazo de matrícula en liña estará aberto do 8 de setembro ao 21 de outubro de 2026, mentres que a actividade académica se desenvolverá do 2 de novembro de 2026 ao 11 de xuño de 2027.
Con esta nova convocatoria, a UNED de Lugo reforza a súa aposta por unha formación lingüística flexible, accesible e adaptada a diferentes perfís e necesidades, facilitando á cidadanía a mellora das súas competencias en idiomas tanto con fins académicos como profesionais e persoais.
As persoas interesadas poden consultar toda a información relativa aos niveis ofertados, requisitos e procedemento de matrícula a través da UNED de Lugo e da páxina web do CUID:
