Móllate polos Ríos Lugo 2026
4 de octubre - 11:00
Móllate polos Ríos Lugo 2026
Promovida polo Proxecto Ríos de Asociación Ecoloxista ADEGA , que chega este ano á súa décimo novena edición e que se desenvolverá o domingo 4 de outubro en 49 concellos de toda Galicia.
A iniciativa mobilizará numerosas persoas voluntarias e contará coa participación de máis de 75 entidades, entre asociacións, concellos, colectivos ecoloxistas, centros de ensino e outras organizacións comprometidas coa conservación dos ecosistemas fluviais.
En Lugo, a coordinación da actividade correrá a cargo da UNED de Lugo, coa colaboración de Coidemos Lugo. A limpeza desenvolverase entre as 11:00 e as 14:00 horas no Parque da Tolda, actuando nas ribeiras dos ríos Rato e Miño.
O punto de encontro será a entrada do Centro Asociado da UNED en Lugo, situado na rúa Tolda de Castela, 4B, desde onde partirán as persoas participantes cara aos treitos nos que se realizará a intervención.
A xornada pretende combinar a retirada de residuos cun labor de sensibilización e concienciación ambiental, poñendo en valor a importancia de preservar os cursos fluviais e os seus ecosistemas. As persoas voluntarias participantes recibirán, ademais, as camisolas identificativas co lema da campaña.
O Proxecto Ríos de ADEGA é un programa de educación e voluntariado ambiental que busca achegar á cidadanía ao coñecemento dos ecosistemas fluviais, visibilizar as súas principais problemáticas e promover iniciativas que favorezan a conservación e mellora dos ríos mediante a participación activa da sociedade.
A participación da UNED de Lugo nesta iniciativa enmárcase no compromiso do Centro coa protección ambiental, a sustentabilidade e a sensibilización cidadá, desenvolvidos a través do proxecto #LugoNaturalMente e das diferentes actuacións que promove ao longo do ano no ámbito da educación e do voluntariado ambiental.
Na páxina web do Proxecto Ríos de ADEGA pode consultarse toda a información relativa á XIX Limpeza Simultánea «Móllate polos Ríos»
