(09:45 h) Workshop ‘Entendendo o Imperio’
Workshop ‘Entendendo o Imperio’
Terá lugar o 10 de novembro na Casa do Saber a partir das 9.45 horas, e a entrada será libre.
O Museo Universitario A Domus do Mitreo, coa colaboración da Deputación de Lugo, organiza un obradoiro centrado no Imperio Romano no que participarán sete investigadores de diversas universidades españolas.
Cunha aproximación multidisciplinar, na que participan epigrafistas, historiadores e filólogos, abordaranse diferentes elementos estruturais que nos permitirán comprender mellor un imperio tan complexo e que tanta influencia exerceu na nosa historia.
Abrirá o coloquio F. Wulff, quen analizará as súas características en comparación con outros grandes estados orientais, como o da China Han. A continuación intervirán J. Santos e J. J. Palao para tratar os seus métodos de conquista, exemplificados na provincia máis extensa do Imperio, a Citerior, así como o seu instrumento esencial: o exército.
Outras dúas ponencias, a cargo de J. L. Jiménez e M.ª J. Castillo, centraranse no urbanismo e na evolución das cidades. Pola súa banda, A. Ruiz abordará o ámbito feminino, habitualmente pouco tratado pola investigación.
Pechará o encontro M.ª C. González cunha exposición sobre a relixión como medio de integración das comunidades do noroeste hispano.
