Punk, pop, folk ou jazz, todos os estilos musicais caben no San Froilán 2025

O Tenente Alcalde do Concello de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, anunciaron a ampliación do cartel do San Froilán 2025, que se celebrará entre o 4 e o 12 de outubro.

Ferreiro salientou que “ás confirmacións xa coñecidas, con artistas como Tanxugueiras, Xoel López ou Lia Kali, engádense agora nomes que reforzan a diversidade e a proxección internacional da nosa programación, como Cristina Branco, Dakidarría, Queralt Lahoz ou El Pony Pisador. Trátase dun cartel que combina tradición e vangarda, voces consolidadas e propostas emerxentes”.

Arroxo engadiu que “o San Froilán non é só un calendario de concertos, senón unha oportunidade para mostrar a nosa identidade cultural e poñer en valor a Lugo como capital da música e da convivencia. Queremos que veciñas e visitantes vivan a festa como unha experiencia colectiva, na que a música, a gastronomía e a tradición se unan”.

Ferreiro destacou tamén que “apostamos por incorporar bandas e proxectos que veñen dende diferentes puntos do Estado e mesmo de Portugal, enriquecendo o diálogo cultural. É importante ofrecer espazos a artistas galegos como Dakidarría ou De Ninghures, que traballan a nosa música dende unha perspectiva contemporánea, pero tamén abrirnos a propostas como as de Queralt Lahoz ou Nogen, que traen novas linguaxes”.

Ferreiro concluíu destacando que “agardamos que a veciñanza e quen nos visite sintan as festas como propias, gozando non só dos concertos nas prazas Horta do Seminario, Santa María e Mosqueira, senón tamén da animación de rúa e das actividades nos barrios”.

Arroxo lembrou ademais que aínda quedan por confirmar máis concertos, pasarrúas e actuacións de orquestras, que se darán a coñecer nas vindeiras semanas e completarán un programa no que se superarán as 200 actividades.

INFORMACIÓN DOS CONCERTOS

Dakidarría

É unha banda galega fundada en 2003 no Val Miñor que fusiona ska, punk e reggae. Comezou cantando en castelán, pero a partir de 2010 pasou ao galego como apoio á disidencia e aos presos políticos. As súas letras, en múltiples idiomas, combinan crítica social con himnos á alegría.

Queralt Lahoz

Cantante catalana (1991), mestura tradición flamenca con hip‑hop, R&B e poesía cun enfoque reivindicativo. Debutou con “1917” (2019) e publica “Pureza” (2021) e “9:30 PM” (2025), cuxo contido autobiográfico explora emocións intensas e a identidade feminina.

Cristina Branco (Portugal)

Fadista portuguesa, nada en 1972. A súa música mestura jazz e fado; empeza en Holanda e logo consolídase en Portugal. Entre os seus discos destacan Abril (2007), Ulisses (2005) e o recente Mãe (2023).

Irmaus da Raia Seca

Grupo galego cuxo repertorio gira en torno ao territorio da Raia Seca (zona fronteiriza entre Galiza e Portugal). Está formado por músicos naturais de A Caniza e A Pobra de Trives e reivindican ese espazo cultural nas súas músicas.

Germán Díaz

Músico e compositor (nado en Valladolid en 1978) establecido en Galicia. Destacado intérprete de zanfoña (hurdy-gurdy), caracterízase pola fusión da música tradicional coa jazz, e por iso foi chamado “o Jimi Hendrix da zanfoña”. Colabora con Baldo Martínez.

El Nido

Cuarteto de Castela e León que reinventa a música tradicional, mesturando instrumentos folk e temas contemporáneos. Debutaron con Huella y Camino (2020), seguiron con Refugios a cielo abierto (2022), e en 2025 lanzaron La Constancia.

SonDeSeu

A primeira orquestra de música folk contemporánea de Galicia, fundada en 2001 por Rodrigo Romaní. Conta con 53 músicos e interpreta temas da tradición oral galega, con estruturas instrumentais complexas. Obtivo o Premio da Crítica Galicia.

Uxía

Uxía Domínguez Senlle (1962, Mos) é unha das voces máis representativas do folclore galego, que renova a música tradicional e difunde a poesía galega. Dirixe proxectos culturais e celebrou máis de 40 anos de carreira musical.

Nogen (Euskadi)

 Formouse en 2016 en Donostia. Practican un pop‑folk íntimo e minimalista. Participan en eventos relevantes da música vasca como LOS40 Euskadi e mezclan estilos diversos.

Pony Pisador (Catalunya)

Grupo festivo de Barcelona fundado en 2013, combina estilos como música celta, bluegrass, sea shanties, yodel, tarantela, habaneras… cun toque de humor e referencias á cultura friki (como Os Reis Magos, literatura fantástica e cómic). Actuaron en Europa, EE.UU. e Canadá.

Abril

Claudia Abril (voz e percusións)e Marina Carpente (violín e voz) integran este proxecto no que melodías tradicionais galegas e ibéricas son adaptadas a sonoridades actuais con certa intimidade, personalidade e frescura.

De Ninghures

De Ninghures é unha banda galega de música folk conformada, á altura de 2019, por un total de 7 integrantes, naturais de distintas localidades do país, tales como Carballo, Santiago de Compostela ou A Fonsagrada. Como grupo, caracterízase pola mestura de ritmos e sons de raíz galega cos equivalentes doutros pobos ibéricos, latinoamericanos ou magrebís.

Mocho Gris

Lucas de Centi (Manzaneda, 1992) e João Neves (Porto, 1987) integran Mocho Gris, un dúo que mestura elementos tradicionais da música galega e portuguesa coa música pop e co que veñen de publicar o segundo adianto do seu próximo álbum, o sinxelo Outro (Os Últimos). 

Loita Amada

Logo dunha longa e exitosa traxectoria na música galega formando parte de bandas como Xenreira, A Matraka Perversa ou NAO, Jásper volve á carga cun novo proxecto musical chamado Loita Amada. 

Nesta nova andaina, acompañado da pandereteira Nébeda Piñeiro, comeza a darlle forma a un proxecto novidoso que xorde da canción protesta galega. O seu obxectivo é conducir este estilo a ocupar novos espazos e sonoridades.