Actividade de divulgación histórica «Como se vestía e armaba un soldado romano?»

 No marco da conmemoración do XXV Aniversario da Declaración da Muralla de Lugo como Patrimonio da Humanidade, a UNED de Lugo acollerá unha actividade de divulgación histórica de primeiro nivel: «Como se vestía e armaba un soldado romano? Historia Viva do equipamento militar básico do Período Altoimperial – Dinastía Flavia«.

O evento, que se ofrece de xeito gratuíto, terá lugar o vindeiro luns 24 de novembro de 2025, de 19:00 a 20:30 horas (sede UNED Lugo ou online», e está organizado en colaboración co recoñecido Grupo Vindicta Recreación Histórica.

https://extension.uned.es/actividad/48625

Historia Viva da Lexión Romana

A sesión ten como obxectivo principal mergullar ao público na vida militar da antiga Roma. A través da metodoloxía da ‘Historia Viva’ e a arqueoloxía experimental, os asistentes poderán coñecer de forma detallada o vestiario, o armamento e o equipo básico dos lexionarios durante o apoxeo do Imperio, concretamente no Período Altoimperial (Dinastía Flavia).

A actividade impartirase no Salón de Actos da UNED Lugo, coa vantaxe de permitir a asistencia presencial e a asistencia en liña, tanto en directo como en diferido, facilitando a participación de interesados de todo o territorio.

Grupo Vindicta: Expertos en Arqueoloxía Experimental

O Grupo Vindicta Recreación Histórica, fundado en Lugo en 2024, é unha asociación cultural sen ánimo de lucro centrada no rigor histórico e na divulgación. A pesar da súa recente creación, conta cun amplo recoñecemento, socios en diversas provincias españolas e colaboradores de honra a nivel internacional, como o recoñecido arqueólogo británico Steven Cockings.

A traxectoria do grupo inclúe colaboracións con destacados centros museísticos como o Museo do Castro de Viladonga (Lugo), o Museo da Vila Romana da Olmeda (Palencia) e o Centro de Interpretación de Aquis Querquennis (Ourense). Ademais, os seus membros participaron en eventos de divulgación histórica en xacementos europeos da talla das Xornadas Europeas do Patrimonio no Parque Arqueolóxico de Pompeia (Italia) e «Les arènes de Nîmes» (Francia).

Esta actividade diríxese a toda persoa interesada na cultura e a historia militar romana, forma parte do ciclo de extensión universitaria da UNED Lugo e reforza o compromiso da institución coa difusión cultural e a celebración de fitos locais.