Obradoiros polo Día Internacional dos Museos

Obradoiros polo Día Internacional dos Museos

Con motivo do Día Internacional dos Museos, que este ano leva por lema “O futuro dos museos en comunidades en constante cambio”, á Rede Museística Provincial de Lugo (RMPL) organiza no Museo Provincial de Lugo unha serie de actividades divulgativas e participativas os días 17 e 18 de maio, dirixidas a todos os públicos.

Estes obradoiros están organizados pola RMPL, en colaboración coa asociación Caetra Lucensium, co obxectivo de achegar a historia e o patrimonio ao público de maneira dinámica e participativa.

CECA: FABRICACIÓN DE MOEDA

Lugar: Entrada do Museo Provincial de Lugo

Instalaremos unha carpa que acollerá unha recreación dunha CECA romana, con fragua e demais elementos típicos, para mostrar todo o proceso de fabricación dunha moeda na época romana.

As persoas asistentes poderán observar e coñecer os diferentes pasos do proceso, participando de maneira segura na acuñación das moedas. Ao remate, poderán levar unha réplica da moeda acuñada no obradoiro.

EXPOSICIÓN DA BOMBA HIDRÁULICA DE CTSEBIO

Lugar: Praza da Soidade, xunto á entrada do Museo

Exporase unha réplica única da bomba hidráulica deseñada por Ctsebio, baseada na peza orixinal que se conserva no Museo Arqueolóxico Nacional (MAN). Esta é, ata o momento, a única reprodución existente da devandita bomba. O público poderá coñecer o seu funcionamento e a súa relevancia tecnolóxica grazas ás explicacións do persoal especializado.

OBRADOIRO DE MOEDAS PARA CRIANZAS

Lugar: Exterior do Museo (baixo carpa en caso de choiva)

Obradoiro especialmente pensado para os máis pequenos e pequenas, que poderán crear a súa propia moeda empregando pasta de modelaxe. A moeda que replicarán será un sestercio da Caetra, que levarán como recordo unha vez finalizado o obradoiro.

OBRADOIRO DE CALIGRAFÍA: TIPOGRAFÍA ROMANA

Lugar: Exterior do Museo (baixo carpa en caso de choiva)

As persoas participantes practicarán a capital rústica romana, unha das tipografías empregadas na Antiga Roma tanto en documentos como en graffitis. Contarán cun caderno de caligrafía deseñado para a ocasión.

INSCRICIÓNS: concertacionsrmp@gmail.com

INFORMACIÓN: info@museolugo.org | Praza da Soidade, s/n, 27001 Lugo | 982 242 112