Santi Araújo en concerto no Lugo Cultural

Santi Araújo é deses artistas que non forzan os tempos. Compón cando sente, escribe cancións para expresar o seu delicado mundo interior. Digamos que esta foi o seu aceno de identidade ata a data: obras que deixan un pouso especial, que calan profundamente no oínte.

Se con Catedral (Ernie Records, 2018) xa deixou claro que a sofisticación é o seu selo, con Solta Ø Morde (Ernie Records, 2022) elévao a unha nova categoría. A voz de Araújo baila ao ritmo de psicodelia e de boleros xunto á de Leonor Watling e á de Anni B Sweet.

Lanzado o 22/2/22, este disco explora a dualidade desde a súa dobre portada, desde os seus cambios de ritmo ou desde os sentimentos atopados nas letras. Todos os discos están pintados a man e inclúen un póster/fanzine e o CD. A edición en vinilo inclúe tamén versións exclusivas de dúas cancións, que non se poderán escoitar en CD ou dixital.