A UNED de Lugo impulsa unha xornada de voluntariado ambiental

A UNED de Lugo impulsa unha xornada de voluntariado ambiental no río Miño dentro do Proxecto Ríos de ADEGA

Desde a UNED de Lugo, no marco do seu compromiso coa educación ambiental, organízase unha nova edición da Inspección de Primavera do Proxecto Ríos de ADEGA, unha actividade de voluntariado dirixida á cidadanía para coñecer e coidar os ecosistemas fluviais da contorna.

A xornada terá lugar o vindeiro 15 de xuño ás 11:00 horas, desenvolvéndose de maneira presencial e ao aire libre no entorno do río Miño, próximo á sede da UNED de Lugo.

Durante a actividade, as persoas participantes realizarán unha inspección ambiental do río, analizando o seu estado ecolóxico mediante a observación directa, a recollida de datos e a identificación de elementos clave como os macroinvertebrados, empregados como bioindicadores da calidade da auga. Ademais, avaliaranse parámetros físico-químicos e posibles impactos sobre o ecosistema fluvial.

Esta iniciativa enmárcase no Proxecto Ríos, un programa de referencia en Galicia que promove a implicación da cidadanía na conservación dos ríos, contribuíndo á elaboración de informes anuais sobre o seu estado de saúde grazas á colaboración de persoas voluntarias e entidades de todo o territorio.

A actividade é gratuíta e está aberta a todas aquelas persoas interesadas en coñecer mellor o medio natural e participar activamente na súa conservación. Ao finalizar, emitirase un certificado de participación como actividade de voluntariado.

Mediante esta acción, desde a UNED de Lugo reforzamos o noso compromiso coa sensibilización ambiental, promovendo a participación activa da sociedade na protección dos ecosistemas e fomentando unha relación máis respectuosa coa contorna natural.