URBAN CORES é a nova cita de arte urbana en Lugo con actividades e talleres de graffiti orientados á xuventude máis desfavorecida.
Serán os servizos sociais municipais os que derivarán a un total de 15 mozos e mozas a estes talleres, nos que poderán compartir experiencias cos artistas invitados e, coincidindo co evento de peche, poderán participar nas obras, e observar as distintas técnicas e enfoques de cada artista.
O primeiro Urban Cores terá lugar entre xuño e xullo, e nel contarase cunha representación das e dos artistas máis puxantes de Lugo e Galicia, e un artista invitado, coas que se embelecerán, progresivamente, edificios e espazos públicos, que se converterán en lenzos para as e os artistas especializados no manexo do spray.
PRIMEIRA EDICIÓN
Concretamente, nesta primeira edición participarán os lucenses DIEGO AS, campión de España de Graffiti e Concepto Circo, que acumulan máis de dúas décadas como muralistas pintado graffitis nos festivais máis prestixiosos, tanto nacionais como Europeos; colaborando con artistas de recoñecido prestixio e traballando para marcas, institucións públicas, pemes e particulares.
Como artista invitado, este evento contará con Dadospuntocero (Da2.0) un dos graffiteiros de León que máis tempo leva no muralismo. Intervirán na Casa da Xuventude, nas Casas Sindicais, na Avenida Infanta Elena e na rúa do Esquecemento, ubicación que acollerá o peche final, no que estarán presentes Noemí Núñez, Natalia Pia, Coitelo, Mosca e Nesui.
