Concerto «Creadoras de Música» no Vello Cárcere

Concerto «Creadoras de Música» no Vello Cárcere

Domingo 24 de novembro de 2024 ás 19 horas.

Organiza: CANTAR DELAS

Dirixidas por FERNANDO GÓMEZ JÁCOME

«Neste 25 de novembro, Día Internacional para a Eliminación da Violencia contra as mulleres reivindicamos as mulleres compositoras pois silenciar a aportación feminina aos distintos saberes é unha forma de violencia, é violencia simbólica.

Na historia universal faltan as páxinas das aportacións femininas á construción cultural e social.

Mulleres escritoras, filósofas, pintoras, científicas e compositoras foron esquecidas, ignoradas e silenciadas por unha sociedade construída en masculino que relegou as mulleres  a un papel secundario,  negándolles o acceso á educación e atribuíndolles como rol fundamental o reprodutivo  e o ámbito privado. 

Confinadas no xineceo do silencio, as mulleres compositoras  e intérpretes foron  invisibilizadas e aínda hoxe, silenciadas.

A ruptura do silencio pasa polo coñecemento e o recoñecemento do seu valor e capacidade creativa.

Cantar Delas organiza o proxecto Creadoras de Música  co obxectivo de dar a coñecer as composicións musicais  e as súas creadoras postergadas  durante séculos á escuridade  da historia.

O concerto comeza coa  compositora do S. XII, Hildegarda von Bigen e rematamos coas compositoras contemporáneas: Modesta Bor, Marisa Manchado, Beatriz Corona, Eva Ugalde e a compositora galega Sés.

Reivindícase o papel da muller nas Cantigas de amigo medievais, nas composicións anónimas dos Cancioneiros renacentistas, e na transmisión e creación da música tradicional.

Interprétanse pezas da cantautora Violeta Parra, e da primeira directora de música de España, a coruñesa Mili Porta.»