Inauguración da exposición «O Derradeiro trazo de xiz»

Inauguración da exposición “O derradeiro trazo de xiz. Memorias dunha escola rural” o mercores 18 de marzo ás 19:00 h. na Sala de exposicións do Pazo de San Marcos.

Do autor Miguel Muñiz.

Mostra fotográfica e documental que poderá visitarse ata o 13 de maio.

Esta iniciativa convídanos a realizar unha viaxe nostálxica e necesaria polas antigas escolas rurais de Galicia, moitas delas hoxe esquecidas ou desaparecidas.

O proxecto pon o foco naquelas comunidades que, ante a falta de recursos oficiais a mediados do século XX, decidiron tomar as rendas da educación dos seus fillos. Así naceron as coñecidas como “escolas do ferrado”, espazos erixidos polos propios veciños onde o mestre recibía como pago unha medida de fariña por neno ao ano.

A exposición retrata con sensibilidade como aquela estrutura educativa, integrada perfectamente no ciclo agrícola e na vida familiar, comezou a esvaecerse coa Lei Xeral de Educación de 1970 e a consecuente concentración escolar nos grandes núcleos de poboación.

A través das imaxes e do material exposto, os visitantes poderán conectar coa historia do noso rural e reflexionar sobre o desarraigo e a perda da cultura tradicional que supuxo o peche destas aulas.

Ademais, grazas á integración de códigos QR, a mostra ofrece unha experiencia inmersiva onde se poderán escoitar os testemuños directos dos poboadores desas escolas, recuperando así as voces de toda unha xeración.

Esta é unha oportunidade única para honrar o esforzo de moitas familias galegas por darlles un futuro mellor aos seus fillos a través do ensino máis próximo e humano.