A área de Cultura organiza campamentos de verán nas instalacións museísticas municipais
Maite Ferreiro: “queremos ofertar unha alternativa para a conciliación na que as nenas e nenos aprendan de maneira lúdica”
As actividades desenvolveranse nas dúas Casas das Linguas, no MIHL e no Vello Cárcere nos meses de xullo e agosto
A concelleira de Cultura, Turismo e Promoción da Lingua, Maite Ferreiro, anunciou unha nova edición dos campamentos de verán organizados nas distintas instalacións dependentes da área.
Segundo informou Maite Ferreiro, “queremos facilitar a conciliación ás familias ao mesmo tempo que achegamos ás nenas e nenos novos coñecementos de maneira lúdica”.
CASAS DAS LINGUAS
As actividades organizadas nas dúas Casas das Linguas municipais estarán orientadas para nenas e nenos de entre 5 e 12 anos, e levaranse a cabo en dúas quendas, do 1 ao 14 de xullo e do 16 ao 31 de agosto, en horario de 09:30 a 13:30 en cada unha das Casas das Linguas, e cunha participación de 15 nenas e nenos en cada unha das actividades.
Para solicitar unha praza, debe contactarse mediante correo electrónico ou en persoa na Casa das Linguas desexada, entre o días 20 e o 22 de xuño.
Os enderezos de correo electrónico habilitados son casa.linguas@lugo.gal para a Casa das Linguas da Estrada da Granxa ou no enderezo casa.linguas.balteira@lugo.gal para a casa das linguas María Balteira.
Cada alumna ou alumno só poderá solicitar unha quincena, e as solicitudes para irmás e irmáns deberán remitirse no mesmo correo, indicando en todos os casos o nome e a quincena solicitada.
MUSEO MIHL
O MIHL organizará campamentos para nenos e nenas entre o 4 de xullo e o 2 de setembro.
As actividades serán semanais e consistirán en xogos artísticos con temática variada, como arquitectura prehistórica, arqueoloxía, pintura, actividades relacionadas coas exposicións da instalación, etc.
Cada semana, o MIHL acollerá a 15 nenas e nenos entre 4 e 12 anos.
As persoas interesadas en solicitar unha praza deberán contactar no enderezo electrónico museo.mihl@lugo.gal, indicando o nome e data de nacemento da nena ou neno, ademais da semana solicitada e un teléfono de contacto.
As solicitudes para as semanas do mes de xullo deberán remitirse entre o 20 e o 22 de xuño, e as solicitudes para agosto, entre o 18 e o 20 de xullo.
O VELLO CÁRCERE
As actividades do Vello Cárcere terán lugar entre o 4 de xullo e o 26 de agosto, e están destinadas a nenas e nenos nados entre o 2010 e 2018.
Organizaranse 4 quendas, con 20 nenas e nenos en cada unha.
O programa de actividades e as solicitudes están no Vello Cárcere ou na súa web oficial.
