Convocado o 24º certame de pintura rápida ao aire libre Cidade de Lugo

A concelleira de Cultura, Turismo e Promoción da Lingua, Maite Ferreiro, anunciou a convocatoria da 24ª edición do certame de pintura rápida ao aire libre Cidade de Lugo, que este ano se celebrará o domingo 14 de xullo. 

No certame poderán participar todas as artistas maiores de 18 anos que o desexen, presentando unha única obra, que non se poderá asinar ata o momento no que se coñeza o ditame do xurado, que estará composto por profesionais das artes plásticas.

«O estilo e a técnica serán libres e a súa temática xirará sobre a cidade de Lugo en toda a súa extensión», afirmou Maite Ferreiro. 

A execución será directa, diante do motivo ou do modelo natural. 

As inscricións realizaranse o día do certame, no momento de selado do soporte, entre as 09:00 e as 11:00 horas nas oficinas da área de Cultura para ser selado. 

As obras presentaranse entre as 16:00 e as 17:00 horas na Praza Maior, onde se coñecerá o ditame do xurado ás 18:00 horas. 

A partir dese momento, e ata as 20:00, farase unha exposición con todas as obras. Ao remate, as autoras e autores non premiadas poderán facerse cargo das súas obras. 

Cada participante terá que traer consigo o material que poida necesitar e considere necesario para desenvolver o seu traballo, incluído (de ser posible) o seu cabalete onde se exporá a súa obra. O soporte non superará as dimensións máximas de 100 x 100 cm

O importe total dos premios é de 5.550 euros distribuídos deste xeito: un primeiro premio dotado con 1.600 euros, un segundo con 1.100 e un terceiro, con 900. A maiores entregaranse 5 accésits de 300 euros e un premio especial ao artista local, nacido ou residente en Lugo, de 450 euros. 

Ademais todas as persoas galardoadas recibirán un diploma acreditativo.