Programación da Mostra de Teatro Clásico de Lugo 2026

Programación Mostra de Teatro Clásico 2026

3 de marzo. “O Espírito de Vania” de Machi Salgado. Centro Sociocultural O Vello Cárcere. 20.30h. Entradas de balde. GALEGA.

Sinopse:

Un actor e un músico entran nun espazo en ruínas. Os espíritos dos personaxes do Tio Vania de Chekhov habitan o corpo do actor para contar a súa historia, intentando entender o que aconteceu naquel lugar, unha vella casa galega onde a rutina, os desexos non correspondidos e os soños rotos marcan o paso do tempo. Un afondamento na capacidade de resistencia do ser humano e na súa desconexión coa terra e a natureza. 

Unha proposta intimista con música en directo na que conviven o tráxico e o cómico e onde cada elemento da escena ten vida propia.

Duración: 85 min. Idade recomendada: A partir dos 14 anos.

6 de marzo. “El Alcalde de Zalamea” de Teatro Corsario. Auditorio Municipal Gustavo Freire. 20.30h.

Sinopse:

“El Alcalde de Zalamea” é moito máis que un drama de honra. Ten bastante de comedia, e non é extraño que unhas cantas escenas provoquen o noso sorriso. Móvese nun código de complicidade co público, facéndolle participar das andanzas dunhas personaxes que sorprenden moito coas súas decisións.

Conta a historia dunha violación e o seu difícil castigo. Neste punto, como non podería ser de outro xeito, so cabe a exposición do horror e a dureza dos argumentos postos na boca de persoas perfectamente recoñecibles, sacadas da vida mesma. O prudente Pedro Crespo, non dubida en negociar co violador da súa filla e invitalo a se converter no seu xenro. Isabel, a vítima, entende que é ela e non o seu agresor quen debe sufrir o castigo. Circunstancias, crenzas e despropósitos dun tempo pasado que, representadas nun escenario e alonxándonos moi pouco da mirada do autor, axúdannos a entender o presente, un presente no que necesariamente teremos que cuestionar aquelo que fumos e descubrir que quizais as cousas cambiaron moito. Ou quizais non.

Duración: 90 minutos. Idade recomendada: A partir dos 15 anos.

7 de marzo. “Atila Furioso” de Cristóbal de Virues pola Compañía EscénaTe e Taquikardia. Auditorio Municipal Gustavo Freire. 20.30h.

Sinopse:

Tras ser apartada da súa familia e país, Flaminia, é obrigada a vivir na corte baixo a identidade de home, co nome de Flaminio, para poder manter en segredo a súa relación de amante co Rei. Pero a Raiña namora del/dela e adoece por ser correspondida.

Flaminia, namorada realmente de Atila, soña con se converter na súa única muller e Raiña de Hungría. Descubre o namoramento do camareiro real, Gerardo, cara a Raiña e tece un plan para que Atila descubra aos dous supostos traidores e sexan condeados a morte.

Porén, a chegada de Celia, Raiña de Dalmacia, caída nas mans das tropas de Atila, da ao traste nas súas pretensións xa que Flaminia é testemuña de cómo Atila declara o seu amor cara Celia e, a pesar de que esta rexéitao, obrígaa a se casar con él. Enfurecida por este feito, Flaminia da ao rei unha beberaxe que fai que enlouqueza e no seu delirio asasina a Celia durante o banquete de vodas. Logo dun desaforado e violento episodio, Atila morre, furioso, pero non sen antes tamén asasinar á propia Flaminia.

Duración: 70 minutos. Idade recomendada: A partir dos 10 anos.

12 de marzo. “La Desconquista” de Ron Lalá. Auditorio Municipal Gustavo Freire. 20.30h. Unha das mellores compañías de clásico do estado. Multipremiada e presente nos mellores teatros e festivais.

Sinopse:

Finais do século XVI. A bordo dunha barca á deriva, tres náufragos reman para alcanzar as costas do Novo Mundo. O capitán Hernán Galán busca a gloria, o mariño Fulano busca o ouro, o misioneiro frei Pío busca almas para a fe. Os tres vivirán mil peripecias e desventuras en alta mar e en costas descoñecidas para descubrir que ninguén é quen di ser e nada é como parece. E descubrindo o Novo Mundo quizais se descubran a si mesmos…

La Desconquista é unha comedia burlesca, cómica e musical, baseada nas crónicas do Descubrimento. Unha viaxe disparatada aos soños e ambicións imperiais ao máis puro estilo de Ron Lalá: cinco actores-músicos, teatro en verso clásico á maneira do Século de Ouro, música en directo, ritmo desenfreado e, sobre todo, moitas gargalladas.

Unha festa escénica e musical que xira ao redor das ambicións, obsesións, medos e angustias do Imperio onde non se puña o sol, no seu afán de conquista e no seu pasmo ante a nova realidade dun continente aínda descoñecido. Unha visión mordaz e delirante con textos e música orixinais, humor vertixinoso, poesía escénica e un quinteto de comediantes inimitables.

Ron Lalá lánzase á Desconquista!

Duración: 80 minutos. Idade recomendada: A partir dos 14 anos.

13 de marzo. “Rey Lear” da Companhia do Chapitô. Auditorio Municipal Gustavo Freire. 20.30h. Compañía portuguesa.

Sinopse:

Nesta versión minimalista do Rei Lear, tres intérpretes encarnan a todos os personaxes, movéndose nunha incesante acción de liberdade. A meta-teatro emerxe como a clave deste xogo, un mecanismo vital para resistir a traxedia.

Non se trata só de contar unha historia, trátase de habitala, desafiala, despregala en movementos que transforman corpos, voces e espazos en algo inestable, efémero, intencionadamente artificial.

O escenario, este territorio mutable, é o lugar onde os personaxes se disolven e recompoñen, onde os intérpretes se moven sen previo aviso entre capas de interpretación, expondo as profundidades do poder e a cobiza. Eles, os actores, son o corazón palpitante da obra, á vez múltiples e singulares, mentres levantan e destrúen o xogo escénico, revelando un espectáculo que trata tanto sobre O Rei Lear como sobre a esencia mesma de contar e reinventar unha historia.

Duración: 80 minutos. Idade recomendada: A partir dos 13 anos.

14 de marzo. “Dicha y desdicha del juego y devoción de la Virgen” de Ângela de Azevedo por Calema Producciones SL. Auditorio Municipal Gustavo Freire. 20.30h.

Sinopse:

O Demo e a Virxe, inmortais ludópatas, xogan a salvación ou condea da humanidade. As protagonistas da súa partida son María, Felisardo, Violante e Fadrique, dúas parellas amorosas que terían que xogalo todo tamén para vencer os obstáculos (a honra, a ambición, a autoridade dos pais, a inconstancia e o desexo de vinganza), salvarse e alcanzar os seus desexos. 

Unha posta en escena lúdica e fresca dunha obra nunca antes representada con tres actores/actrices que xogan a ser nove personaxes sobre un taboleiro teatral, dados, fichas, marionetas, humor, azar e música ao servizo da visión iconoclasta e modernísima da autora portuguesa do século XVII, Ângela de Azevedo. Non vai máis!

Duración: 90 minutos. Idade recomendada: A partir dos 15 anos.

15 de marzo. “CaLORCAlor” de Guayominí Producciones SL. Auditorio Municipal Gustavo Freire. 18.00h.  FAMILIAR. Premio OH 2023 ao Mellor Espectáculo para la Infancia.

Sinopse:

Coma nun xogo de crianzas e de palabras, se repites “calor” unha vez tras outra pode que unha onda te leve a Granada, a Fuente Vaqueros, á casa de Federico García e Vicenta Lorca, pode que ao seu patio, ou quizais, se o repites, chegues a unha palleira e alí  atopes a Arantxa e Lobo, apoiados sobre os versos de Lorca, tratando de levar ao teatro o arrecendo do mar, tentando averiguar o xeito de encher un patio de butacas de estrelas.

Tamén é posible que, se repites «calor» unha vez tras outra, chegues a ambos lugares.

Duración: 50 minutos. Idade recomendada: A partir dos 6 anos.

19 de marzo. “La Loca Historia del Siglo de Oro” de La Escalera de Tijera e Z Teatro. Auditorio Municipal Gustavo Freire. 20.30h. Premio mellor dirección no Festival Nacional de Teatro Vegas Bajas.

Sinopse:

O retrato dunha España chea de luces e sombras, reis, pintores, dramaturgos, clero, pícaros e cómicos envolven A TOLA HISTORIA DO SÉCULO DE OURO e retratan os acontecementos sucedidos durante este século, narrando as andanzas, aventuras e desventuras dunha sociedade guiada polos designios de Deus e dos Reis. 

Un percorrido disparatado polos momentos máis brillantes —e tamén máis ridículos— do teatro clásico. Entre Lope, Calderón, Cervantes e compañía… nada será como o recordabas. Con humor, música en directo, xiros inesperados e a frescura de dúas compañías que saben mesturar o clásico co contemporáneo, esta obra transforma o Século de Ouro nun espectáculo delirante para todos os públicos.

Duración: 65 minutos. Idade recomendada: A partir dos 12 anos.

20 de marzo. “FARRA” Compañía Nacional de Teatro Clásico e Compañía Lucas Escobedo. Auditorio Municipal Gustavo Freire. 20.30h. Premio Max 2025 ao Mellor Espectáculo Musical ou Lírico.

Sinopse:

Festa, celebración, cultura e comunidade atópanse durante o tempo de entroido de 1568 ou de 1668 ou de 2024. Durante as “carnestolendas” todo é posible, as normas cambian e o mundo ríxese por paradoxas. A farra barroca, a festa, abre a porta á música, a loucura, a maxia ou a acrobacia entre moxigangas, danzas e regocixos. E, como toda subversión, o obxetivo radica en sinalar a loucura do pasado e do presente, removendo conciencias e celebrando o noso encontro.

Duración: 75min aprox. Idade recomendada: a partir de 6 años

21 de marzo. “Las abarcas desiertas” de La Compañía del Alba. Auditorio Municipal Gustavo Freire. 18.00h. FAMILIAR.

Sinopse:

No curso das súas aventuras polo mundo, un xograr atópase con Miguelín, neno pastor a quen este ano non lle trouxeron nada os reis magos. Entón ambos deciden emprender unha longa viaxe cara Oriente. Alí descubren que Gaspar, Melchor e Baltasar foron secuestrados polo Señor da Guerra, e xuntos terán que liberalos. Unha historia con sorprendentes títeres, seres marabillosos e música en directo.

Unha emocionante fábula interpretada por un xograr que se serve dos títeres, a música e a palabra poética para que emprendamos, con él e co neno Miguelín, unha longa viaxe cara Oriente.

Duración: 50 minutos. Idade recomendada: A partir dos 6 anos.

22 de marzo. “Artur Ui, o ovo da serpe” de Talía Teatro. Auditorio Municipal Gustavo Freire. 18.30h. GALEGA.

Sinopse:

Artur Ui, o ovo da serpe representa unha decidida aposta por conectar a vixencia do teatro épico de Bertolt Brecht coa realidade contemporánea. Máis aló de ser unha homenaxe a un clásico moderno, esta produción explora con profundidade crítica os mecanismos de poder, a natureza do autoritarismo e as súas manifestacións ao longo da historia, establecendo un paralelismo claro co contexto político e social actual.

Duración: 90 minutos. Idade recomendada: A partir dos 14 anos.