«O Camiño Inmersivo», a I+D do audiovisual galego sae de Lugo

Setembro 2019 A produtora lucense Microsoños en colaboración con  outros profesionais da cultura e a innovación acaba de poñer en marcha «O Camiño Inmersivo»,  un proxecto cultural baseado no I+D do concepto inmersión, unha nova disciplina artística que converte aos observadores en personaxes dentro dunha historia guionizada, que ten a capacidade de mutar en función das reaccións e perfís dos participantes. Estas experiencias inmersivas están concebidas para ser gravadas, e obter un produto audiovisual de calidade cinematográfica.

O Camiño Inmersivo presenta 6 inmersións ao longo da xeografía galega (a primeira xa tivo lugar en Verín), visibilizando as rutas xacobeas menos coñecidas e distintas realidades no marco da Galicia máxica. Tomando o Camiño de Santiago ao longo dos séculos como fío condutor, as participantes terán a posibilidade real de viaxar no tempo a través das historias que se foron labrando no imaxinario dun pobo.

Enmarcada dentro das actividades vencelladas á promoción do vindeiro Xacobeo 2021, os participantes serán absorbidos como personaxes dunha historia que estará guiada por actores profesionais. Non se poden desvelar os detalles, pero si que coñecerán a un científico tolo, a peregrinos de todas as épocas e incluso ao mesmísimo Alfonso II. Todo está suxeito á   improvisación e calquera pode ser artífice de moitos cambios.