Faladoiro «Urbanismo e acceso á vivenda»

Faladoiro «Urbanismo e acceso á vivenda»

Mércores 12 de marzo, ás 19.00 horas, na cafetaría da Escola Politécnica Superior de Enxeñaría do Campus de Lugo.

Sobre o encontro

Conseguir que toda a poboación poida acceder a unha vivenda digna é un dos principais desafíos que temos que enfrontar como sociedade. En realidade, o principal:

• o Barómetro de febreiro de 2025 do CIS (Centro de Investigaciones Sociológicas) destaca que o 34,1% das persoas entrevistadas mencionaron a vivenda como a súa primeira preocupación.
• No apartado que o Informe Anual 2023 do Banco de España lle dedica a este asunto explícao así: desde o ano 2014 a fortaleza da demanda, unida a unha rixidez da oferta, provocou un crecemento sostido dos prezos da compravenda e do aluguer. E claro, ao subiren os prezos o problema concéntrase nos grupos sociais de menor renda: mocidade e persoas inmigrantes.

Terá razón o Banco de España? É só o evidente, un problema de desaxuste entre oferta e demanda? Ou haberá tamén, máis agochados, outros elementos que explican a situación que estamos a vivir? Pero sobre todo, que podemos facer para superala?

E aínda hai máis: o problema de atopar unha vivenda non é só urbano. Cada vez máis traballos académicos sinalan que a dificultade para acceder a unha vivenda nas zonas rurais é un dos elementos que explica a perda de poboación que sofren estes espazos.

Para falar de todas as arestas desta realidade traemos á Escola Politécnica Superior de Enxeñaría a dúas persoas con experiencia que teñen moito que achegar:

• Cristina Botana Iglesias, arquitecta urbanista e investigadora na USC, cunha traxectoria centrada no acceso á vivenda dos colectivos mais vulnerábeis.
• Bernardo Varela, tenente de alcaldesa de Allariz, un concello rural que medra en poboación e sofre problemas graves de dispoñibilidade de vivenda a pesar de poñer en marcha actuacións innovadoras na materia.

Esta iniciativa enmárcase dentro da programación artellada ao abeiro do convenio Lugo Cultural asinado por USC, Cultura e Turismo do Concello de Lugo e Vicepresidencia da Deputación Provincial de Lugo.

Dentro dos ‘Encontros de Lúa Chea’, un programa de debate sobre cuestións de actualidade organizado polo colectivo universitario Proxéctate en Galego e incluído dentro da programación da Primavera Cultural

Axenda Cultural de Lugo.

www.vivalugo.es

https://www.facebook.com/vivalugo

https://www.instagram.com/vivalugo/

https://x.com/viva_lugo