Segunda edición do curso «Tempo de Arte. Obras de Museo»

Segunda edición do curso «Tempo de Arte. Obras de Museo»

O Museo Provincial de Lugo acollerá os vindeiros 20 e 21 de marzo a segunda edición do curso  “Tempo de Arte. Obras de Museo”, organizado polo Grupo de Investigación Iacobus da USC, en colaboración co Museo Provincial e a Vicepresidencia da Deputación de Lugo,

O curso, polas investigadoras e profesoras de Historia Miriam Elena Cortés e Patricia Cupeiro e pola directora do Museo Aurelia Balseiro, inclúe un programa de conferencias nas que as investigadoras e investigadores do grupo analizarán varias obras das coleccións e fondos do Museo Provincial de Lugo.

A escultura San Francisco de Asís de Asorey, os cadros Samos de Leopoldo Nóvoa, Ambiente de Paz de María Corredoira e Paisaxe con castiñeiro e Asno e gaivotas de Castelao, o cartel O Cebreiro de Camilo Díaz Baliño, os sartegos de Salgado Gundín e elementos arquitectónicos como o capitel angular da Catedral de Lugo centrarán os relatorios, que se celebrarán no refectorio do Museo e que se complementarán coas visitas ás pezas.

A deputada de Cultura Iria Castro e a directora do Museo Provincial de Lugo Aurelia Balseiro agradeceron a iniciativa, que se desenvolverá por segundo ano no Museo contribuíndo á divulgación das súas coleccións e fomentando o interese polo seu estudo e investigación.

Inscricións

As persoas interesadas en participar nas xornadas, gratuítas, deben inscribirse a través a través do código QR do cartel do curso ou do enderezo electrónico monograficosiacobuslugo@gmail.com .

Ofrécense 60 prazas.

Monográficos Iacobus

A actividade forma parte do ciclo de Monográficos Iacobus, promovido polo Grupo de Investigación Iacobus, que pretende contribuír á difusión de pezas destacadas dos museos galegos.