Exposición sobre as flores silvestres de Galiza en O Vello Cárcere ata o 24 de marzo
O artista Constantino González Pérez expón, en O Vello Cárcere de Lugo, 24 cadros pintados ao natural de flores silvestres de Galiza cada un coa súa respectiva descrición. Son obras realizadas ao óleo sobre lenzo, caracterizadas polo uso de trazos sinxelos e abundante luz, inspirada na corrente do Impresionismo.
Constantino González Pérez conta cunha dilatada experiencia pictórica, que comezou aos once anos na Escola de Artes e Oficios de Vigo. Tras emigrar a Venezuela, continuará neste país coa súa formación artística na Academia de Belas Artes de Caracas, expoñendo en diversas galerías e centros culturais. Nos anos 90 tornará a Galiza pasando a ser socio do colectivo ALTERARTE, expoñendo en diferentes cidades de España e Portugal.
