CALI danza estrea “Donas” no Gustavo Freire
Domingo 14 de xaneiro ás 20.30 h. con entradas (5 €) na billeteira web de Entradas Lugo ademáis da billeteira do propio auditorio.
A Cía. Cali danza inaugura o Ciclo LED de danza programado pola Concelleria de Cultura, Turismo e promoción da lingua do Concello de Lugo para este ano, coa estrea da súa segunda produción -logo de “Feminitude”- onde o mundo da muller volve ser protagonista.
“Donas” é unha creación sostida pola trascendencia, que navega polo simbólico dando voz aos ecos do subconsciente feminino, unha obra circular, próxima ao trance que envolve ao espectador, creando un clima emocional aberto a todo o espazo máis aló do marco escénico e de todas as barreiras.
En palabras da directora e coreógrafa da obra Alba Felpete, “Donas fala de facernos capitanas das nosas vidas, da ciclicidade, da vida e da morte, de sexualidade, de fondas feridas interxeracionais, de manifestos, de loita, de sororidade e de amor, sobre todo de amor”.
As bailarinas amosarán nos 50 min. de espectáculo unha poesía corporeizada, unha alegoría dos aspectos femininos da existencia encarnados no corpo da muller, un camiño en feminino que recolle as voces ancestrais e as ilumina no presente.
FICHA ARTÍSTICA
A nova produción conta ademáis cun plantel moi importante na parte artística como o caso de Sabela Adalid como asitente coreográfica. A música – inédita- é obra do creador escocés de espazo sonoro Iain Armstrong, compositor asociado á Cía. americana Humanhood, unha das referencias da danza contemporánea actual a nivel mundial. O deseño de luces foi realizado polas alumnas de Escenografía da EASD Ramón Falcón, baixo a coordinación e supervisión de Eva Valle Legido.
ENTRADAS
“Donas” producida por CALI está co-producida pola Concelleria de Cultura, Turismo e promoción da lingua do Concello de Lugo, coa colaboración do MIHL, do Conservatorio Profesional de Danza de Lugo e da Escola de Arte e Superior de Deseño Ramón Falcón. A súa estrea terá lugar o domingo 14 de xaneiro ás 20.30 h. no Auditorio Municipal Gustavo Freire de Lugo, con entradas á venta (5 €) na billeteira web de Entradas Lugo ademáis da billeteira do propio auditorio.
