O Festival de poesía As Lupercais celebrará, en Lugo, o 27 e 28 de febreiro, a súa quinta edición.
A cita deste ano comezará o venres 27 no Vello Cárcere coa lectura de Ana Gorría do seu libro Nostalgia de la Acción. Este libro, que contén ilustracións de Marta Azparren, foi escrito a partir da obra de Maya Deren. Así, acompañaran ás lecturas imaxes da obra da directora ucraína e a presentación correrá a cargo de Miguel Blanco Hortas.
O sábado 28 abrirá pola mañá, ás 12:30, cunha homenaxe ao poeta lugués Luís Pimentel. Será en forma de paseo que dará inicio onda a estatua do autor de Sombra do aire na Herba, na Praza Maior.
As lecturas serán feitas por membros das lupercais e outras poetas amigas convidadas. En caso de choiva trasladarase ao Vello Cárcere.
Pola tarde será o tempo de lecturas de oito poetas convidadas, novamente no Vello Cárcere de Lugo. Este mosaico de voces será conformado, na quenda das 18:00 por Manuel Vázquez, Almudena Otero Villena, Jorge Teixeira e Simón Rodríguez.
Para finalizar contaremos, ás 19h30 con Xosé Miranda, Marcos Canteli, Helena Salgueiro e pechará cunha proposta performativa Lola Nieto.
Xuntaranse, así, algunhas das máis interesantes voces de Lugo con outras do país, así como poetas de raíces en América, Madrid, Cataluña, Asturies e Portugal.
Con esta quinta edición, o Festival das Lupercais quere consolidarse coma un evento de referencia, un punto de encontro de mans dadas coas participantes e co público.
