O vindeiro sábado, 31 de outubro, a Vicepresidencia estrea no Pazo de San Marcos o documental Carvalho Calero. Sem Fronteiras, un percorrido pola vida e obra do autor ferrolán, homenaxeado este ano no Día das Letras Galegas. A proxección coincide coa data elixida pola Real Academia Galega para celebrar o
Pleno Extraordinario do Día das Letras Galegas, adiado en maio por mor da pandemia.
A Vicepresidenta Maite Ferreiro lembrou que “ se trata dunha gran oportunidade para achegarse á figura do autor e coñecer tanto a súa produción literaria como académica e tamén o seu pensamento. Unha difusión necesaria nun ano coma este, en que a situación sanitaria condicionou toda as actividades que se organizan tanto desde o ámbito cultural como desde o educativo arredor do Día das Letras Galegas”.
A proxección realizarase ás 19.00 horas no Salón de Actos do Pazo de San Marcos, con entrada libre ata completar a capacidade do espazo, limitada
a 60 persoas pola situación sanitaria. En cumprimento dos protocolos de prevención establecidos pola Deputación de Lugo, as persoas interesadas
en asistir á proxeccion deberán reservar previamente o convite a través do correo cultura@deputacionlugo.gal ou achegarse ata o Salón de Actos dez minutos da estrea.
Carvalho Calero. Sem Fronteiras
O documental, dirixido por Aser Álvarez, aborda a vida e a obra do autor dende unha perspectiva contemporánea e multidisciplinar. Gravado entre Ferrol, Lugo, Santiago de Compostela e outras localidades de Galiza, Portugal e Madrid, reconstrúe a complexidade e amplitude da figura de Carvalho Calero a través de material de arquivo, de conversas e entrevistas con familiares, expertos, alumnos e discípulos, así como historiadores, outros literatos, académicos, amigos e críticos.
Ademais, o traballo audiovisual inclúe tamén a lectura de fragmentos da obra do autor en diversas localizacións colaboracións artísticas que lle confiren un carácter popular e divulgativo.
500 libros para os centros educativos e bibliotecas municipais
Carvalho Calero Sem Fronteiras conta cunha publicación homónima que repasa a traxectoria persoal, política, académica e literaria do autor a través dos seus propios textos e de fotografías, parte delas do arquivo familiar. A Vicepresidencia distribuirá 500 exemplares do libro entre as bibliotecas municipais e os centros educativos da provincia, co obxectivo de proporcionar recursos para ampliar o coñecemento da biografía e obra do intelectual ferrolán.
