Inauguración da mostra “A cor que me invade”
O 29 de xaneiro ás 19:00 horas, a Sala de Exposicións do Pazo Provincial inaugura a mostra titulada “A cor que me invade”, unha proposta artística de María José Leira que se presenta como unha nova iniciativa dentro do programa 284,01 % envellecemento sabedoría (antes 278,81 %) da Rede Museística Provincial de Lugo.
Esta exposición supón unha inmersión no universo creativo dunha autora que entende a pintura como unha canle vital de expresión, un camiño que iniciou na súa infancia fascinada pola síntese do debuxo e que, co paso do tempo, transformouse nunha profunda reflexión sobre a esencia humana.
A obra de Leira nesta colección non nace dun impulso illado, senón que se nutre dun coñecemento adquirido a través da experiencia e dunha admiración consciente pola sorte de vivir.
Na súa pintura, a artista explora a dualidade do Homo sapiens, un ser capaz de crear marabillas e de habitar os horrores máis fondos. Ante esta dicotomía, a súa proposta convida ao espectador a vibrar coa claridade e coa escuridade, pero sobre todo con esa luz que asolaga de cores o hábitat humano, procurando que a arte actúe como esa propiedade emerxente que logra penetrar no mundo interior de quen a observa.
A intención última de María José Leira con este traballo é transcender a mera técnica para espertar sentimentos e interrogantes sobre a nosa propia existencia e a contorna que nos rodea.
Os seus cadros articúlanse como mensaxes plásticas cargadas de matices, onde se tecen as emocións e os pareceres que conforman a identidade. Integrada no marco de sabedoría e posta en valor da Rede Museística, a exposición configúrase como un espazo de encontro onde a cor e a luz aspiran a alumar as zonas de escuridade, ofrecendo unha ollada honesta e vibrante sobre a complexidade da vida.
