Mural do artista lucense Manuel Pallín poñendo en valor a cultura castrexa. Representa unha guerreira ataviada con elementos característicos como arracadas, unha fíbula, colar castrexo e puñal de antena.
Lugo contará cun gran mural do gran muralista lucense, Manuel Pallín (Concepto Circo), que se pintará nunha medianeira do edificio número 158 da Rolda da Muralla para poñer en valor a cultura castrexa lucense
Será unha guerreira castrexa a que se representará, ataviada cos elementos característicos como son as arracadas (pendentes femininos), unha fíbula como pasador da roupa, un colar castrexo e un puñal de antena.
Manuel Pallín estivo asesorado para este traballo pola directora do Museo Provincial de Lugo, Aurelia Balseiro, e polo arqueólogo Enrique Alcorta.
A obra conta xa coa autorización de Patrimonio e estará pintada cunha gama cromática de grises e beiges para ser respectuosos coa contorna da Muralla, Patrimonio da Humanidade,
A rexedora, Lara Méndez destacou que “con este mural queremos, ademais, amosar o papel que as castrexas tiveron hai 2.000 anos na defensa da súa terra dominada entón polos romanos, pero tamén o protagonismo das mulleres no Arde Lvcvs, con catro asociacións formadas integramente por mulleres e unha presenza e participación superior ao 40% en todas as celebracións”.
Neste senso, lembrou que, no 2021, Lugo recibiu o galardón Tourism Women Friendly, promovido pola organización Mujeres para el Diálogo y la Educación (MDE), pola visibilización da muller nesta festa de recreación histórica.
