A mostra «Vivir o mar» chega a Viveiro en agosto
Baiona foi a primeira localidade na que recalou esta exposición articulada por imaxes icónicas do fotógrafo Philippe Plisson,
Afundación, a Obra Social de ABANCA, e Lunwerg Editores presentarán, ao longo dos meses estivais, a mostra de imaxes do recoñecido fotógrafo Philippe Plisson, «Vivir o mar». Ata o 19 de xullo, poderase contemplar a pé de rúa no baionés Paseo da Palma, trasladando, deste xeito, a cultura aos espazos abertos. A continuación, trasladarase á praza dos Barcos de Sanxenxo, desde o 22 de xullo ata o 9 de agosto. Logo será a quenda de Viveiro, nos xardíns Noriega Varela, desde o 12 ata o 25 de agosto. A seguir, poderase contemplar na avenida da Mariña de Sada, desde o 28 de agosto ata o 13 de setembro.
A mostra de fotografías de Philippe Plisson componse de 35 paneis, entre imaxes e texto, articulados en 7 seccións: As 1000 caras do mar, Acariñando a terra, Construíndo o mar, A conquista do mar, Desafiando ao mar, Gardiáns do mar e A batalla perdida. As emblemáticas fotografías de Plisson son o resultado de vinte e cinco anos de traballo en cincuenta países diferentes. A forza e a beleza das instantáneas axudan a sensibilizar e a visibilizar sobre o estado dos mares e océanos e invitan a adquirir un compromiso coa conservación do medio mariño, orixe e sustento da vida no noso planeta. Da súa vitalidade e conservación depende o mantemento de todo canto existe no mundo.
